عن أسيوط والقاهرة

عن أسيوط والقاهرة؛ كان محمود سالم بيسأل ايه شكل المحافظات ونظرتها للقاهرة إزاي فكتبت تعليق فيه كتير من أفكاري بالخصوص ده ونقتلته زي ما هو هنا:

أسيوط: الناس فيها شايفين إن القاهرة حجيم علشان الزحمة والجو الملوث وما إليه والنظرة التقليدية لأهلها إن ملهمش أصل ونصابين. وبالنسبة للأجيال القديمة فهي شارعي الهرم وعماد الدين ومحلات الكباب والكفته في السيدة زينب.وبيروحوا مخصوص لغاية دلوقت الموالد.
على المستوى السياسي للأسف حتى المعارضة والثورة بشكل عام شويه إتعدت من النظام وبيبصوا للناس وأعضاء منظمتهم على أساس أنهم أصوات أو أتباع مش أنداد وده من ساعة السبعينيات برضه لما كان فيه حركة شيوعية في أسيوط فيه استثناءات طبعاً لكن قليلة.
وعلشان اللي بتقوله بخصوص القرارات ده فحاصل إن أي مسؤول نازل من القاهرة كأنه بيبقى رسول وفي إيده الحل والعقد والموضوع بنوي برضه أي حد نازل من أسيوط المدينة لقرية برضه كأنه رسول وهو اللي هيحل كل المشاكل.
أسيوط المدينة مختلفة عن أسيوط القرى في الشكل”ممكن تقول شبه القاهرة كده” نظراً لعمليات التحديث اللي حصلت بوجود جامعتي أسيوط والأزهر من الستينيات، لكن الطباع هي هي طباع الريف الصعيدي ﻷن معظم قاطني أسيوط من القرى أساساً ولسه على تواصل دائم بالجذور، على الرغم من إن مؤخراً حصلت انفراجه والأجيال الجديدة مختلفة شويه، أسيوط القرى لسه زي ما هي مش بيطول غير المراكز قدر من عمليات التحديث.
ممكن تلاقي صور ﻷسيوط المدينة كتير على الأنترنت وده ألبوم فيه شويه صور من قرية كده ممكن يوريك الفرق https://www.facebook.com/media/set/?set=a.10152970014916528.1073741830.730336527&type=3
أهالي أسيوط المدينة مشهورين بأنهم يهود مصر نظراً لحرفتهم التجارة من زمان وحرصهم الشديد ﻷن أسيوط كانت ترانزيت التجارة من الجنوب، الناس دلوقت بتسمع كل حاجة وبشكل أساسي الذوق الشعبي القاهري هو تقريباً السائد بالإضافة لياسين التهامي وغيره من المنشدين الصوفيين ومغنين المووايل، بشكل عام دلوقت الثقافة الشعبية بقت خليط بين الأصل الصعيدي والطابع الشعبي بتاع القاهرة، اللي ممكن نقول عليه يعني الطبقة الوسطى شبه في الشكل والذوق نظيرتها في مصر كلها باستثناء إنها أكثر محافظة بكتير علشان أصولهم الصعيدية الريفية وإن ارتفاع التقدير والمكانة مرتبط طردياً “بالمحافظة”. وإن كان مؤخراً بعد 25 يناير حصلت انفراجه وانتكاسة في نفس الوقت اللي عنده استعداد للتفتح عمل ده واللي له ميل محافظ شديد زاد يعني الأمور تحركت نحو الأطراف أكتر. لسه برضه بالنسبة للناس سواء في المدينة أو القرى أهم شئ هو العائلة ثم العائلة حتى لو فيه فشخ بينهم لكن لازم القشرة الخارجية للعلاقات تبقى كده، والناس هنا مش في حالها خالص لازم الخلطه والإنخراط في شئون العائلة والأقارب والأصدقاء و كده وإن كان اللي مش بيعمل كده دلوقت مبقاش يتعيب زي زمان. الأطعمة المشهورة الكشك والفطير المشلتت والبتاو. الناس هنا طائفين جداً نظراً للموروث الصعيدي الريفي الذكوري ووجود الإسلامين المتشددين بشكل قوي من السبعينيات.أسيوط العقارات فيها غالية جداً جداً يعني ممكن بتمن شقة في مكان فوق متوسط يجيب شقة 90 متر في الرحاب وده علشان كتير من الأسايطة سافروا الخليج وفيه قرى نسبة كبيرة من شباباها بيروحوا اليونان وإيطاليا”لسه ميت 45 شاب من أبنوب وهما بيحاولوا يحصلوا أقرانهم” ودكاترة الجامعة اللي من أسيوط واللي مش من أسيوط لكن أستقروا فيها علشان مهنتهم اللي برضه راجعين من بره كله إستثمر في العقارات فبقت غالية عن قيمتها بكتير. كش عارف كل ده مفيد ولا ﻷ لكن شكراً على أي حال

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: